Найди своих депутатов

ТААТТАЛАР ИЛ ТҮМЭН ДЕПУТАТЫГАР ТИРЭЭН ТУРАР КЫҺАЛҔАЛАРЫН ЭТИННИЛЭР

Вернуться

Бу күннэргэ Таатта улууһугар 32-с №-дээх Таатта -- Томпо быыбардыыр уокуругуттан Ил Түмэн депутата Виктор Лебедев үлэлээтэ. Быыбардааччыларын кытта көрүстэ, тыа сиригэр тирээн турар кыһалҕалары иһиттэ.

Депутат Виктор Лебедев Таатта улууһун кырыы нэһилиэгин Хара Алдан быыбардааччыларын кытта көрүһүүттэн саҕалаата. Салгыы Уус Таатта, Баайаҕа нэһилиэктэригэр сырытта. Ил Түмэн үлэтин билиһиннэрдэ, тыа сирин олохтоохторун тирээн турар кыһалҕаларын иһиттэ. Тыа хаһаайыстыбатын сайыннарыыга, суолу тутууга, оҕону иитии-үөрэтии боппуруостарыгар туруорсуулары, накаастары эттилэр.

Иккис күн Үс Аммаҕа көрүстэ. Харбалаахтааҕы чоҕу хостуур разрезка сырыттылар. Үс Амма нэһилиэгин олохтоохторо өрүс уҥуор тахсан дьиэ туттарга мас кэрдэллэригэр, бултуулларыгар хааччахтыыр мэһэйдэр баалларын эттилэр. Туймаада нефть сапыраапката сабыллар кутталлааҕын, оччотугар тыа хаһаайыстыбата эстэригэр тиийэрин долгуйалларын биллэрдилэр. Аны сыбаалкаҕа тахсар бөх нолуоктаныыта кыра нэһилиэктэргэ сөбө суох дьаһал буоларын ыйдылар. Сири оҥорууга ылысыахтарын баҕаралларын, сүөһүгэ-сылгыга бөрөлөр кутталы үөскэтэллэрин уо.д.а. боппуруостары көтөхтүлэр.